L'onn 1035 ha l'uvestg Hartmann fatg fabritgar da nov sia residenza en la claustra a Müstair. I dat ina residenza eleganta cun in atrium. Tras gronds portals pudevan ins traversar la tur centrala ed en lingia directa er l'atrium per arrivar en l'annex dal nord da la baselgia e da quel en la nav da la baselgia. Il proxim uvestg Thietmar ha dal 1040 interrut questa axa da processiun ed ha fabritgà ina chapella da dus plauns, la chapella dal sontg Ulrich e la chapella dal sontg Nicolaus.

Chapella dal sontg Ulrich e dal sontg Nicolaus

La chapella dal sontg Ulrich en il plaun terren è dal 1100 vegnida decorada cun frescos e stuccaturas. In arvieut radund plain d'animals marins marchescha l'entrada en il chor. La chapella dal sontg Nicolaus è situada sur la Chapella dal sontg Ulrich. A l'entschatta aveva ella in plafond plat cun picturas da meander. Enturn 1200 han ils picturs da la baselgia claustrala er qua picturà da nov la vart da l'ost. Il retabel da l'altar da l'onn 1758 cuntegna in maletg en ieli da la sontga Ursula, patruna da l'abadessa Ursula Carl de Balcun At che ha fatg renovar quest local enturn 1645 sco chapella privata dal prinzi uvestg. Oz serva ella sco chapella dals morts da las soras.