![[Translate to Romanisch:] Erdbeben](/fileadmin/_processed_/8/6/csm_Erdbeben_56f5a4073b.jpg "[Translate to Romanisch:] Erdbeben")
960: Construcziun da la Tur Planta
Tur da defensiun sco protecziun en cas d'attatgas
Enturn la mesadad dal 10-avel tschientaner han attatgas da barbars smanatschà l'imperi dad Otto I. Er l'uvestgieu da Cuira era vegnì devastà enturn l'onn 940 da Saracens. Perquai ha l'uvestg Hartpert laschà eriger l'onn 960 nord da la baselgia ina tur massiva da defensiun per proteger sia glieud ed ils muntgs.
Angelina Planta
L'intern era endrizzà per abitar. La tur porta oz il num da l'abadessa Angelina Planta che l'ha laschà cumplettar suenter l'incendi dal 1499. En ella chattan ins dapi l'onn 2003 il museum claustral.
1499: La battaglia da Chalavaina
La battaglia da Chalavaina lascha enavos fastizs er en la claustra
Durant la battaglia da Chalavaina, la guerra tranter Grischuns e Tirolais, è la claustra vegnida incendiada. L'abadessa Angelina Planta ha stuì prestar blera lavur da reconstrucziun. Ella ha fatg finir il rinforzament cumenzà da las miraglias claustralas e da las turs da portal, fatg remplazzar il claustrigl, auzar il tract dal nord sin trais plauns, eriger ina stalla en il nord-vest da l'areal claustral, e na l'ultim da tut ha ella fatg fabritgar or danovamain la Tur Planta.
1994: Terratrẹmbel
Terratrembels e sfessas mainan a la decisiun da metter il museum en la Tur Planta
Ils 24 da settember 1994 ha in terratrembel relativamain debel causà gronds donns en la "Fürstenburg" a Barbusch en il Tirol dal sid vischin. Er la Tur Planta aveva sfessas en circa la medema grondezza sco la Fürstenburg. Tar in ulteriur terratrembel fiss il privel stà grond ch'er la Tur Planta crudass ensemen. La tur ha stuì vegnir sanada, quai che duvrava meds finanzials considerabels.
Per las localitads restauradas fissi stà donn da las utilisar vinavant sco deposit. Perquai ha la fundaziun "Pro Kloster St. Johann in Müstair" proponì da dischlocar il museum claustral en la Tur Planta e d'al concepir tut nov. Il convent è stà perencletg.
La Tur Planta vegn sanada e perscrutada archeologicamain
Sper las examinaziuns staticas e las mesiras architectonicas han ins perscrutà er archeologicamain. Questas perscrutaziuns han palesà l'istorgia fascinanta da la construcziun da la tur. Cunter las supposiziuns da pli baud na datescha la Tur Planta betg da la perioda guvernamentala da l'abadessa Angelina Planta (1478-1509), ma è 600 onns pli veglia. Ils archeologs han chattà en ils mirs laina d'armar che ha pudì vegnir datada cun la metoda dendrocronologica. Questa laina è vegnida smersa durant l'atun / l'enviern 957 / 958 e la primavaira 961. Cun quai è la Tur Planta la pli veglia tur d'abitar e da defensiun en la regiun alpina.
