In quist lö pudaivan commembers da la comunità eir gnir sepulits, sco eir laics o spirituals seculars. Pro s-chavs sül areal inter da la clostra da Müstair sun gnüdas documentadas 1133 sepultüras.

I’l clostrigl svess as rechattaivan sur 130 fossas, las bleras persunas gnivan sepulidas cul cheu vers l’ost o orientadas in direcziun dal üert dal clostrigl. Ellas derivan per gronda part da la romanica fin il temp d’immez tardiv, dunque ca. dal temp da 1200 fin 1500. A partir dal 1878 sun las sepultüras internas gnüdas scumandadas.

Davant l’entrada pro l’annex dal nord han archeologs ed archeologas scuvert l’on 1986 la fossa (N 404) d’ün ot dignitari dal 10avel fin 11avel tschientiner. Sco supplemaint han els chattà ün chalsch ed üna patena in ün format da miniatura. Tals objects vegnan dovrats dad ün sacerdot pro la celebraziun da l’eucaristia, pro la transfuormaziun da pan e vin in corp e sang da Christus. Sül chalsch as rechattan stizis d’üna inscripziun d’ün nom: […](R)TPERTS. Laprò as pudess trattar d’ün dals ovais-chs da Cuoira Hartpert (us), (mort 971) o Nortpert(us) da Hohenwart (mort 1088). Chalsch e patena sun exposts i’l schler da la Tuor Planta a la finischun dal clostrigl.

Pro la paraid da l’ost dal clostrigl in directa vicinanza da la cusadüra da fabrica tanter baselgia clostrala e Tuor Planta as rechatta üna inscripziun fragmaintaria dal 11avel tschientiner. Schabain chi sun mantgnüdas be parts, sun ils archeologs dal maniamaint chi’s referischan a sepultüras chi han gnü lö quia.

+ [. . .] QU[.] CERNV[NT]V[R] SVN[T . . . T]RANSIR[E]

NAM TERRA[M] REPETVNT DE QUA PR[. . .]

V[N]DE MEANDO V[. . . . . . . . . . . . . . ] TIBI PRE[. . .]

QVAE BREVITATE CA[.]C[. .]DV[. .]S[. . . . . . . ]

HEC QVOS TERRA PR[E]M[I]T M[. . . . . . .]

ALTER ERA[T . . .] CE[. . .]ICTVS [. . ]AL[T]E[. . . ]

[. . . . . . . . . . . . . .]E[ . .]AN[. . ]LEGIS DE[. . . . . . . . . . . . . .]

OBLITI MISERE HV[I]V[S] M[. . . . . . . ]NCAN[. . .]

H[. . . . . . . . . . ]A P[.]TITO [. . . . . . . . . . . . . .]

[. . . . . . . . . . . . . .]NA[.] LOCET IN [. . . . .]

Sur l’üsch pro l’annex dal nord as rechatta il negativ d’üna scena da cruzificaziun sco algordanza a la mort da Christus vi da la crusch.