775 Fundaziun
Tenor la legenda è Carl il Grond, suenter sia curunaziun sco retg dals Langobards, vegnì sin il Pass da l'Umbrail en ina burasca ch'el ha survivì saun e salv. Sco engraziament sto el avair fundà la claustra Son Jon. Da quai dat testimonianza la statua da stuc en la baselgia. L'emprim era quai ina claustra per muntgs, dapi il 12- avel tschientaner èsi dentant in convent per mungias. Durant si' istorgia da passa 1250 onns era la claustra adina abitada.
1163: San Jon a Müstair daventa ina claustra per mungias
Muntgs van davent e mungias vegnan
Uvestg Egino ha surlaschà l'onn 1163 sia residenza al giuven convent da soras ed ha sa laschà construir nord da la Tur Planta in palas (ina sala represchentativa) inclusiv edifizis accessoris. Quest fatg sco er la scuverta d'in pitschen zain dal 12-avel tschientaner cun l'inscripziun
+ DVLCEM [·DAT S]ONUM · VENIAT · PIA · TVRBA · SORORUM
„Cur ch'el dat in sun dultsch, vegnia natiers la fulla pia da las soras.“
dattan perditga ch'enturn 1150 entran mungias en la claustra e ch'ils muntgs van davent. Dapi quella giada vivan qua soras benedictinas en il ritmus reglà dal „ora et labora et lege“.
![[Translate to Romanisch:] Unesco Tafel Kloster St. Johann](/fileadmin/_processed_/6/f/csm_UNESCO-Schild-Kirche-2025-IMG_0935_f7656196cd.jpg "[Translate to Romanisch:] Unesco Tafel Kloster St. Johann")
1983: Dapi l'onn 1983 bain cultural mundial
En l'occasiun da la tschantada dal comité per ils bains culturals mundials ils 5 fin 9 da december 1983 a Firenza vegn la claustra Son Jon da las mungias benedictinas recepida en la glista dals bains culturals munials da l'UNESCO. Il medem mument vegn recepì er l'areal da la claustra da Son Gagl e la citad veglia da Berna, dentant er lieus cun nums enconuschents sco Macchu Pichu e Taj Mahal.
Motivaziun da la recepziun en la glista dals bains culturals mundials
Il tgirader da monuments Hans Rutishauser motivescha la recepziun sco segua: „La claustra Son Jon a Müstair è ina perditga unica da l'art e da la cultura carolingica. La baselgia cun trais apsidas è sa mantegnida cumplettamain, cun excepziun dal palantschieu sur e da la tettaglia. L'unitad tranter l'edifizi carolingic e sia decoraziun vala sco unica en l'entir' Europa. Ils stgavaments cuntinuants furneschan enconuschientschas fundamentalas davart l'istorgia da la construcziun da la claustra. En pli posseda la claustra in equipament impurtant dal temp medieval classic e tardiv, sco er dal temp baroc.“
(H. Rutishauser, 8.11.1982, in: Convention concerning the Protection of the World Cultural and Natural Heritage. Nomination to the World Heritage List).
