L'appartament per il prinzi uvestg ha l'abadessa Ursula V. Carl de Balcun At fatg fabritgar sur l'ala dal nord da la residenza da l'uvestg romanica tempriva. La stiva vegn ornada d'in tavlegià da schember cun entagls prezius, d'ina pigna cun plattinas cun glasura da colur sco er d'in balcun tort cun sguard sin la curt d'economia. Dasper chatt' ins ina chombra, er tavlegiada cun schember, ed ina cuschina cun arvieut. Plinavant tutga tiers in local da reuniun cun bleras vopnas ed ils maletgs dals sontgs patruns da las conventualas da quella giada. Davent da la stgala s'avra ina fanestra en la Chapella dal Sontg Nicolaus.
Avant che l'onn 2003 il museum da la claustra è vegnì avert en la Tur Planta, pudevan ils giasts visitar questas localitads. Ussa èn ellas vegnidas restauradas e servan dapi l'onn 2012 sco localitads d'instrucziun per novizas sco er per discussiuns e reuniuns da las mungias.
