Dapi passa 1200 onns è ella il center da la vita claustrala: la baselgia claustrala cun ses frescos unics che proclameschan l'istorgia dal salit.
L'emprim era la nav da la baselgia claustrala ina sala simpla cun paraids glischs sut in palantschieu sur da lain plat. La baselgia è vegnida picturada ora enfin l'ultim e pli pitschen chantun: in cudesch illustrà cun purtrets da colur magnifics da l'istorgia biblica dal salit.
La structuraziun dals frescos carolingics vegn pli bain visibel vi da la paraid vers nord. I dat tschintg registers ed ina rait da quaders rectangulars, en ils quals i vegnan mussadas las singulas scenas.
Oz paran ils frescos carolingics d'esser senza cuntrast, en colurs cotschnas e colur da la terra. Cun quai dattan els be ina sblatga perditga da lur intensitad da glisch, coluraziun e plasticitad originala. Els han patì sut incendis, vegliadetgna ed intervenziuns umanas.
Las picturas eran vegnidas picturadas per muntgs scolads, sco sustegn visual tar lur approfundaziun en l'evangeli. Sin il register sur ils arvieuts vegnan mussads scenas dal Vegl Testament da la vita dal retg David. Ils trais registers d'amez èn deditgads a l'uffanza da Jesus, a sias pregias e miraclas ed a la passiun. Il register giusum è per gronda part destruì. El cuntegna l'ovra ed il martiri dals successurs apostolics da Cristus.
Il register pli aut da la paraid vers ost vegn oz zuppà da l'arvieut e mussa ina scena da l'ascensiun. En las calottas vegn trais giadas represchentà Cristus: en il center sco glisch dal mund en la gloria d'ina mandorla dubla, circumdà dals quatter evangelists ed accumpagnà dad anghels. En la calotta vers nord surdat Cristus clav e cudesch a Petrus e Paulus. Cun quai vegn mussà la fundaziun da la baselgia. La crusch da gemmas en l'apsida dal sid cun il medagliun central da Cristus stat per il triumf da Cristus sur da la mort. Ils registers inferiurs da las apsidas èn deditgads als sontgs titulars dals altars: Joannes Battista amez, Petrus e Paulus al nord, e Stefanus al sid. La paraid dal vest mussa il return dal Figl da Dieu, il giuvenessendi.
Cumbain che Müstair è enconuschent gist per ses frescos carolingics, han quels conuschì mo temps glorius modests. Els èn adina puspè vegnids surpicturads e cuvernads. Pir l'onn 1894 èn els vegnids rescuvrids tras ils dus istorichers d'art Josef Zemp e Robert Durrer. Els èn lura vegnids fatgs visibels tranter l'onn 1947 e 1951.
