Tranter 1947 e 1951 ha l'architect Walther Sulser, accumpagnà dal president da la Cumissiun federala per la tgira da monuments, professer Linus Birchler, manà la restauraziun da la baselgia claustrala. Cun l'agid da l'administratur pader Placidus Berther e diversas mungias ha il restauratur Franz Xaver Sauter fatg visibel ils maletgs medievals. Il far liber cun spateglia e martellin ha causà diversas perditas da colur. Per part han ins cumplettà quai che mancava.
l ciculus dals frescos carolingics na sa lascha betg datar exactamain. Ils istorichers d'art proponan l'emprima mesadad dal 9-avel tschientaner. Ma senza dubi avevan ils frescos cuvert tut las paraids enfin l'ultim chantun. Il program iconografic dal ciclus carolingic vesan ins il meglier anc oz vi da la paraid dal nord.
En las apsidas han ins distatgà la part sisum dals frescos romanics. Els na tatgavan betg pli bain sin la paraid. Las picturas romanicas en las calottas da las apsidas eran cun il temp pli probabel per gronda part gia crudadas giu.
Diversas da las picturas distatgadas pon ins ussa vesair en il museum claustral. Dus maletgs èn actualmain ensemen cun ina copia da la statua da Carl il Grond da Müstair en il museum istoric tudestg a Berlin, auters èn en il deposit da la claustra Son Jon a Müstair.
Questas picturas eran vegnidas fatgas enturn l'onn 1200, cur che la claustra d'umens originara è daventada in convent da dunnas.