Dal 1613 è Ursula Carl de Balcun At entrada cun 16 onns en la claustra. L'onn 1625 è ella vegnida elegida sco priura, suenter ch'ella aveva renunzià a la dignitad d'abadessa a favur da Caterina Mohr ch'era pli veglia. Tschintg onns pli tard sa lascha ella drizzar en ina pitschna abitaziun cun vestibul, stiva e chombra. Quai n'è betg stà la regla, perquai che atgnas residenzas eran be reservadas a las abadessas.
Ursula V. Carl de Balcun At derivava d'ina veglia famiglia jaura da magistrats. La famiglia possedeva il chastè „Balcun at“ sin in spelm da l'autra vart da la vallada. Oz datti be pli paucas restanzas da quel. Da la schlatta Balcun At èn pliras dunnas entradas en claustra. Trais da quellas èn vegnidas elegidas sco abadessas. Ursula V. era abadessa dal 1640-1666 ed era quella che ha fabritgà il pli bler.
„Nagin auter fabricat da la claustra n'è daventà talmain intim sco questa stivetta.“, ha scrit Josef Zemp al cumenzament dal 20-avel tschientaner. El aveva perscrutà l'areal da la claustra ed aveva cumprà la stanza per il Museum naziunal svizzer. Là è quella vegnida preschentada var 70 onns en l'exposiziun permanenta. L'onn 2000 ha ella pudì vegnir fabritgada en puspè en ses lieu original sco emprest permanent, nua ch'ella è oz accessibla al public.
La "Chombra Balcun At", la stiva da la priura Ursula, pon ins oz vesair en il museum. Ella fa propi parada. Ella è be 4,03 m lunga, 3,13 m largia e 2,39 m auta. Ella è tavlegiada cun schember, ha ina pitschna pigna, ina stgaffetta da paraid e duas fanestras cun rudellas e barcuns movibels. La fanestra da sid vegn ordadora decorada cun picturas decorativas.
