„Quant che nus eran surprais che frescos dal 8-avel tschientaner ans han guardà en la glisch da las laternas sin palantschin stgir“, ha scrit Joseph Zemp dal 1928 a ses collega da perscrutaziun Robert Durrer. Ils dus istorichers d'art avevan preparà in inventari precis, e cun lur publicaziun han els rendì enconuschent quest stgazi unic.
Fitg prezius per la perscrutaziun actuala èn surtut las fotografias da Joseph Zemp, sco er ils aquarels dals frescos sin il palantschin ch'ils dus perscrutaders han fatg far en la scala 1:4 avant ch'ils frescos èn vegnids distatgads cun la metoda strappo ed èn vegnids transportads en il museum naziunal a Turitg. La publicaziun da Joseph Zemp e Robert Durrer "Das Kloster St. Johann zu Münster in Graubünden" (Genf 1906-1910) è anc oz da gronda impurtanza per la scienza.
