Cun entrar en la baselgia claustrala dat oz dalunga en egl l'arvieut gotic tardiv. 1488-1492 ha l'abadessa Angelina Planta laschà fabritgar en l'arvieut, ils pilasters e l'empora per las mungias. Uschia è la baselgia daventada ina baselgia cun nav tripla. Quella giada eran ils frescos carolingics per gronda part gia surpicturads e per part renovads cun ils maletgs gotics.
L'empora da las mungias tutga tar la clausura. Da stad sa radunan las mungias benedictinas da Müstair là tschintg giadas al di per lur uras canonicas monasticas. Visitaders da la baselgia claustrala èn envidads da tadlar l'uraziun da las mungias e da chattar tras il sfunsar en ils psalms forsa er sezs in pau quietezza e pasch interiura.
