Igl è finamira principala da la fundaziun da duvrar meds finanzials dal maun public e da funtaunas finanzialas privatas sco donaziuns u relaschs per la restauraziun professiunala e la renovaziun adequata dal stabiliment da la claustra. La part da la finanziaziun privata daventa vi pli impurtanta. In grond resun ha adina l'acziun da las cartas postalas fundada da l'anteriura priura Pia Willi. Cun quella ed ulteriuras activitads gida er la communitad da la claustra essenzialmain da metter las finanzas sin ina buna basa.
Cun guardar da cuntanscher questas finamiras prenda la fundaziun rigurusamain resguard sin la vita claustrala. En pli lavura ella stretgamain ensemen cun instanzas ecclesiasticas sco l'ordinariat episcopal a Cuira, cun la scienza, sco er cun las instanzas chantunalas, regiunalas e localas.
Entant che la fundaziun metta l'accent principal da sia lavur sin il procurar meds finanzials e lavurs da coordinaziun, s'occupa la cumissiun da construcziun sco organ cuminaivel da la fundaziun e da la claustra da tut las lavurs architectonicas da renovaziun e da restauraziun. Per la planisaziun detagliada e la realisaziun pratica è responsabel il manader da gestiun, actualmain sar Ulrich Veith.
