Edifizis sacrals carolingics

La claustra Son Jon da Müstair datescha dal 8-avel tschientaner. Carl il Grond la sto avair fundà. Da quai dat testimonianza la statua en la baselgia claustrala. Il cumplex da la claustra è vegnì fabritgà en relativamain curt temp. Dal temp carolingic èn sa mantegnidas anc la baselgia claustrala e la chapella da la sontga crusch.

 

La baselgia - il center da la claustra

A l'entschatta serviva la baselgia claustra be al convent. Pir en il temp da la refurma dal 16-avel tschientaner è ella daventada baselgia parochiala ed uschia accessibla per tut ils crettaivels. Da stad vegn qua celebrà regularmain la messa.

 

Il mund da maletgs fascinant e Carl il Grond

La baselgia da la claustra Son Jon a Müstair cuntegna il pli grond e pli bain mantegnì ciclus da frescos dal temp medieval tempriv dal mund entir. Maletgs carolingics e romanics decoreschan ils mirs e las trais apsidas. L'entira istorgia dal salit vegn mussada sin maletgs. Els raquintan la vita dal retg David dal Vegl Testament, l'uffanza, l'operar ed il patir da Jesus, sco er l'ascensiun ed il return da Cristus. Las apsidas èn deditgadas a sontgs e martirs: Joannes Battista, Stefanus, Petrus e Paulus.

En pli inscuntrain nus en la baselgia claustrala la pli veglia statua monumentala da Carl il Grond. Actualmain vegn quella analisada cun las pli novas metodas. Cun malpazienza e mirveglia spetgain nus las pli novas enconuschientschas ed istorgias che questa statua ans vegn a raquintar.

 

Ina visita guidada fa senn

En occasiun d'ina visita guidada pon noss visitaders vegnir a conuscher l'architectura e l'istorgia da la claustra. Ma els pon er sa laschar fascinar dal mund dals maletgs ch'era l'emprim reservà unicamain als muntgs ed als spirituals.

 

Chapella da la sontga crusch - juvel dal temp carolingic

Oz stat la chapella da la sontga crusch in pau da la vart vi da la via che maina a la baselgia claustrala. En il 8-avel tschientaner era ella colliada directamain cun il cumplex da la claustra. Il plaun sisur serviva pli probabel als avats ed als auts dignitaris sco chapella privata.

Ins po visitar quest plazzal da perscrutaziun fitg interessant

Las lavurs da la perscrutaziun da la construcziun e da la restauraziun vi da la fatschada èn vegnidas finidas l'onn 2011. Ils frescos en il plaun sut èn vegnids restaurads, il plaun sur cun ses stgazis è amez la fasa da restauraziun.

En occasiun dals termins publitgads e sin cunvegna pon ins visitar quest plazzal interessant da la perscrutaziun da construcziun. Cun ina visita guidada survegnis Vus in' idea dad ina da las pli interessantas plazzas da restauraziun da Müstair.

 

Uraris d'avertura

La baselgia è averta mintga di. La chapella da la sontga crusch pon ins visitar be en il rom da visitas guidadas als termins publitgads u tenor cunvegna.

Infurmaziuns survegnis Vus en la butia da la claustra.

T. +41 (0)81 858 61 89
visit-museum @ muestair.ch


Uraris d'avertura per visitas guidadas:

matg – october: da las 9:00 – 17:00
la dumengia e dis da festa: 13:30 - 17:00

november – avril: da las 10:00 – 12:00 e da las 13:30 – 16:30
la dumengia e dis da festa: serrà l'avantmezdi; 25 da december serrà tuttadi