Activitads da la Fundaziun "Pro Kloster St. Johann in Müstair"

Activitads

Enfin la fin dals onns 90 predominavan lavurs da sanaziun e da renovaziun il champ da lavur da la fundaziun. En etappas cleramain fixadas vegnivan meglieradas las cundiziuns da viver da las mungias e vegniva optimada l'infrastructura da l'agricultura sco ina da las funtaunas d'entradas principalas. Oz stat en il center la realisaziun da projects parzials, quai ch'è er interessant per sponsurs che vulan sa far in purtret precis dal diever da lur contribuziuns.

Midaments considerabels èn sa dads l'onn 1983, cur che la claustra Son Jon ensemen cun la citad veglia da Berna e l'areal da la claustra da Son Gagl è vegnida renconuschida sco patrimoni cultural mundial da l'UNESCO. Quest augment da la reputaziun da noss monument cultural ha dalunga gì positivas sin il dumber dals visitaders. Cun quai èn s'avertas er novas dimensiuns per la fundaziun. Il sustegn da la claustra han ins en consequenza stuì effectuar en in rom pli vast, numnadamain in rom regiunal e sur ils cunfins.

Cur che l'onn 2008 er la Viafier retica tranter Tusaun e Tiran è vegnida messa sin la glista dals patrimonis mundials, han ins stuì tschertgar sinergias tranter la claustra ed il svilup turistic. Cun quai èn er la communicaziun e l'infurmaziun vegnidas pli impurtantas. Cun in vast program per sensibilisar il public per la claustra Son Jon è Elke Larcher-Gasperi sa bain etablida sco manadra en questa sparta. Ella è la partenaria per las medias sco er per ulteriuras persunas ed instituziuns interessadas vi dal svilup da la claustra.

Il champ da responsabladad da la fundaziun è anc ina giada vegnì engrondì tras l'extensiun da la Biosfera. Quella ch'era limitada l'emprim sin il Parc Naziunal Svizzer ha l'UNESCO l'onn 2010 extendì er sin la Val Müstair. Novas structuras politicas en la Val Müstair, midaments vi da vias en vischinanza da la claustra ed adattaziuns en la domena da la producziun agricula pretendan che las activitads per il sustegn da la claustra han da vegnir visas vi pli d'in optica pli vasta. Gist facturs agrar-politics sco la concepziun futura da la producziun da latg e da chaschiel en la Val Müstair pudessan, tut tenor las decisiuns, avair influenzas negativas sin las entradas da la claustra. Per esser sez en il possess dals criteris da valitaziun ha la fundaziun laschà elavurar expertisas.

Cun l'institut per l'istorgia d'art da l'universitad da Berna datti ina collavuraziun cun l'intent da mantegnair e da fabritgar or Müstair sco lieu da perscrutaziun.