28 da schaner 2013: priura Domenica Dethomas surpiglia la direcziun dal convent

Priura Domenica è la 57-avla manadra dal convent da Müstair

Ils 11 d'october 2012 è ella vegnida elegida, ils 28 da schaner 2013, la festa da Carl il Grond, è ella vegnida installada: la nova priura sora Domenica Dethomas. Ella segua a sora Pia Willi ch'aveva manà il convent per passa 26 onns. Suenter 32 abadessas e 24 priuras è sora Domenica Dethomas ussa la 25-avla priura en la claustra Son Jon a Müstair.

L'installaziun solenna en la baselgia claustrala da Müstair ha gì lieu tras l'uvestg Vitus Huonder da Cuira ed en preschientscha dal spiritual pader Gregor Imholz. Ils 28 da schaner è per la claustra Son Jon a Müstair ina data impurtanta; quest di vegn celebrà il fundatur da la claustra, Carl il Grond.


Suenter 120 onns puspè ina priura da Müstair

Cun 25 onns è sora Domenica entrà en claustra e viva dapi lura be 100 meters davent da ses anteriur dachasa davos ils mirs da la claustra plains d'istorgia. Actualmain è ella l'unica en il convent che vegn da Müstair. Suenter 120 onns maina ussa puspè ina mungia da Müstair il convent da las soras da Son Jon. {LINK zu einem Artikel im mas-chalch pdf}


Purtar il spiert benedictin tranter ils umans

Las incumbensas da sora Domenica sco mussadra e pli tard sco collavuratura en il museum e sco subpriura l'han dà la pussibilità d'avair il contact cun la populaziun da la Val e cun ils numerus giasts da dalunsch e damanaivel. Uschia è quai ses intent da far enconuschent la claustra e sia spiritualitad benedictina er ad umans ordador ils mirs da la claustra. Sias lezias sco priura èn descrittas cleramain en la regla da Sontg Benedetg, medemamain la maniera, sco ch'ella ha da manar la claustra e sco ch'ella ha da represchentar quella vers anor.

Uschia deditgescha il Sontg Benedetg gist dus chapitels da sia regla al manader d'ina claustra. La priura sto esser conscienta, tge "lavur difficila e stentusa" ch'ella surpiglia, numnadamain "da manar umans e da servir a la particularitad da bleras." (regla benedictina 2,31)