2003: Avertura dal museum da la claustra en la Tur Planta

Museum en la Tur Planta

Il museum era l'emprim loschà en l'abitaziun dal prinzi uvestg en il tract dal vest dal cumplex claustral. Ils 13 da fanadur 2003 ha il museum nov concepì pudì vegnir avert en la Tur Planta. El è mintgadi avert e porscha visitas guidadas en lingua tudestga, taliana, englaisa, franzosa e rumantscha. Numerusas abitantas da la Val Müstair collavuran cun il museum.


Terratrembels e sfessas mainan a la decisiun da metter il museum en la Tur Planta

Ils 24 da settember 1994 ha in terratrembel relativamain debel causà gronds donns en la "Fürstenburg" a Barbusch en il Tirol dal sid vischin. Er la Tur Planta aveva sfessas en circa la medema grondezza sco la Fürstenburg. Tar in ulteriur terratrembel fiss il privel stà grond ch'er la Tur Planta crudass ensemen. La tur ha stuì vegnir sanada, quai che duvrava meds finanzials considerabels.


Per las localitads restauradas fissi stà donn da las utilisar vinavant sco deposit. Perquai ha la fundaziun "Pro Kloster St. Johann in Müstair" proponì da dischlocar il museum claustral en la Tur Planta e d'al concepir tut nov. Il convent è stà perencletg.


La Tur Planta vegn sanada e perscrutada archeologicamain

Sper las examinaziuns staticas e las mesiras architectonicas han ins perscrutà er archeologicamain. Questas perscrutaziuns han palesà l'istorgia fascinanta da la construcziun da la tur. Cunter las supposiziuns da pli baud na datescha la Tur Planta betg da la perioda guvernamentala da l'abadessa Angelina Planta (1478-1509), ma è 600 onns pli veglia. Ils archeologs han chattà en ils mirs laina d'armar che ha pudì vegnir datada cun la metoda dendrocronologica. Questa laina è vegnida smersa durant l'atun / l'enviern 957 / 958 e la primavaira 961. Cun quai è la Tur Planta la pli veglia tur d'abitar e da defensiun en la regiun alpina.


Ina claustra en la claustra

Il concept da museum deriva da Raphael Sennhauser, istoricher d'art ed anteriur administratur da la fundaziun "Pro Kloster St. Johann in Müstair". El è sa vulì concentrar sin l'essenzial ed ha vulì mussar be paucs objects. Cun quai duain las localitads discurrer per sasezzas. La vita claustrala sco er l'istorgia da l'art e da la construcziun chattan lur plazza en la Tur Planta. En pli han ins pudì esser datiers a la baselgia cun ses frescos da renum mundial.