1810: L’abazia daventa priurat

Augustina Wolf, lultima abadessa da la claustra Son Jon a Müstair

Ils 7 d'avrigl 1810 mora l'ultima abadessa da la claustra Son Jon a Müstair, Augustina Wolf dad Algund. L'onn 1806 era ella sco la pli giuvna mungia vegnida elegida sco abadessa. Ella è stada be trais onns e quatter mais en uffizi. Ses fist da l'abadessa è oz exponida en il museum.


La secularisaziun da la claustra è previsa

Suenter la mort d'Augustina Wolf ha il Corpus Catholicum vulì dissolver la claustra. Per entant han ins impedì l'elecziun d'ina nova abadessa e l'admissiun da novizas. L'ultim prinzi uvestg da Cuira, Karl Rudolf von Buol-Schauenstein, e la vischnanca da Müstair èn dentant s'engaschads a favur da la claustra, er pervia da si' impurtanza religiusa ed economica. L'existenza da la claustra è bain vegnida salvada, ma fin oz na maina betg pli ina abadessa la claustra.


L'abazia daventa priurat

Seraphina Albrecht da Brixen surpiglia l'onn 1810 il priurat. Dapi quella giada han 25 priuras manà la claustra. L'onn 1824 ha il Corpus Catholicum danovamain suttamess al Cussegl grond il giavisch da dissolver la claustra Son Jon a Müstair. L'uvestg da Cuira e la vischnanca da Müstair èn puspè s'engaschads per che la claustra exista vinavant.


L'onn 1828 ha il Cussegl grond decis d'installar in administratur. Quel aveva da controllar mintg'onn las finanzas da la claustra. Mintga nova admissiun ha stuì vegnir sancziunada da la regenza. Grischunas pajavan 1'500 guldiners per lur admissiun en la claustra, dunnas dad auters chantuns 2'000 guldiners ed estras schizunt 4'000 guldiners. La claustra ha adina gì bleras mungias dal Tirol vischin. Cun questa mesira las avevan ins rendì pli grev lur admissiun. Davent da l'onn 1832 è dentant il numer da las mungias puspè s'augmenta: L'onn 1955 eran 31 mungias benedictinas en claustra, e l'onn 2014 èn quai nov mungias ed ina mungia auxiliara da la Filippinas.