1799: Franzos occupan la claustra, dapi quella giada è persa la hostia dal sontg sang

Schuldads prendan alloschi en la claustra

En la segunda guerra da coaliziun, en la quala la Frantscha cumbattevan cunter la Russia e l'Austria, è la Val Müstair daventada champ da battaglia. Las mungias eran mitschadas ad Algund e Meraun en il Tirol dal sid vischin. Las mungias eran var 100 dis absentas, ed uschia era la claustra en quest temp en ils mauns dals partids da guerra.


Cur che las mungias èn returnadas, han ellas gì l'impressiun che la claustra era stada inabitada per ventg onns. La stiva dals famegls era vegnida duvrada sco stalla dals chavals, la cuschina sco mazlaria, la stanza dal prinzi uvestg sco ufficina da chalgers. Il claustrigl sumegliava ad ina cuschina. Il convent era transfurmà en biro da militar. En la baselgia era l'orgla destruida, ils bancs ars, ils altars donnegiads. Er ils tetgs avevan patì. Bler era simplamain svanì, tranter auter er l'ostensori cun la reliquia dal sontg sang.