1758: Construcziun da la chapella da grazias per la reliquia dal sontg sang

Il miracul da la hostia dal sontg sang maina a la construcziun d'ina chapella

Sut l'abadessa Maria Angela Katharina Hermanin zu Reichenfeldt è vegnida construida la chapella da grazias per la veneraziun da la hostia dal sontg sang. Questa hostia va enavos sin in eveniment miraculus en il 13-avel tschientaner ed aveva motivà il pelegrinadi a Müstair. Dal 1767 han bainfatturs regalà dus altars novs en onur da quest miracul. In da quels stat anc oz vi da la paraid da l'ost da la chapella.



La reliquia va a perder, ed il maletg da grazias vegn a Müstair

L'onn 1799, 41 onns suenter la construcziun da la chapella, è la reliquia dal sontg sang vegnida engulada dals franzos durant la segunda guerra da coaliziun. En quest connex è pli probabel er la chapella vegnida donnegiada. Pir cun la translocaziun dal maletg da grazias da Sta. Maria l'onn 1838 ha il pelegrinadi pudì vegnir reactivà. Il retabel da l'altar è vegnì adattà al maletg da grazias dal 1621.



Duns votivs e rosas da palpiri da colur

A la paraid dal vest pendan ils duns votivs, duns religius ch'expriman u il giavisch per ina grazia u l'engraziament per insatge retschavì. Sin in palpiri ornà cun ina rosa da palpiri pon ils visitaders scriver lur giavisch u engraziament, lur uraziun u lur intercession, e pender quel vi da la paraid votiva. Las mungias da Müstair prendan quests giavischs ed engraziaments regularmain giu da la paraid per ensserrar quels lura en lur uraziuns.

 


Restauraziuns dal 20-avel e 21-avel tschientaner

L'onn 1904 han ins stuì malegiar da nov l'intern da la chapella. Plunas da naiv avevan dal 1902 smatgà en il tetg. Per la festa dals 150 onns da la translocaziun dal maletg da grazias a Müstair l'onn 1938 han ins puspè embellì la chapella. Josef Malin ha fatg novas stuccaturas, e la platta da marmel carolingica è vegnida montada sco antependi davant l'altar.

Dal 1949-1951 han ins montà las fanestras dal sid actualas cun ils sontgs Placidus e Nicolaus da Flüe. Il palantschieu è vegnì cuvert cun plattas da granit e las glischs da paraid èn vegnidas electrifitgadas. Ulteriuras restauraziuns èn seguidas en ils onns otganta. L'enviern 1994/1995 ha aua da naiv fatg gronds donns vi da las stuccaturas. L'onn 2006 è vegnì renovà il tetg e l'onn 2010 l'intern.