1528: La baselgia claustrala daventa baselgia parochiala

Müstair resta fidel a la cretta catolica

L'abadessa Barbara de Castelmur aveva da tegnair pitg a las sfidas da la pesta ed als scumbigls da la refurmaziun. Ella ha empermess a la populaziun da Müstair il diever cuntinuant da la baselgia claustrala sco baselgia parochiala. I ha dà ina votaziun che ha furnì material per legendas. Igl è dentant in fatg che Müstair sco unica vischnanca en la part svizra da la Val Müsair è restada catolica. Sco segn visibel per la baselgia parochiala è vegnì fabritgà enturn il 1530 in clutger.

 

Il clutger è vegnì construì en pliras etappas

Ils emprims trais plauns dal clutger èn vegnids fabritgads entaifer quatter onns, il plaun cun ils zains passa 50 onns pli tard. La sutga dals zains odierna è vegnida fabritgada en enturn 1644. Il clutger ha quatter zains. Ils dus zains pli pitschens èn vegnids culads curt suenter la battaglia da Chalavaina l'onn 1504 ed èn ils zains ils pli vegls en tut la val. Il zain il pli grond deriva da l'onn 1558, ed il quart zain è 107 onns pli giuven. Oz è la suna sontga programmada electronicamain. L'accord dals quatter zains d' / e' / cis'' / f'' è fitg spezial. La sequenza dals tuns n'è betg usitada e dat al sunar dals zains in caracter ferm ed original.

 

Clutger, baselgia e Tur Planta furman ina siluetta unica

Il tetg plat cun duas alas e las proporziuns dal clutger fan supponer ch'il clutger na saja betg fabritgà a fin. Igl è dentant prest ina vardad fundamentala che provisoris duran il pli lunsch. Oz marcheschan il clutger, las apsidas da la baselgia claustrala e la Tur Planta cun ses mirs cun dents crennads daspera la siluetta incumparabla da la claustra Son Jon a Müstair.