1512: Constituziun da l’abazia da Castelmur

Barbara de Castelmur installescha sia residenza en il tract dal nord

L'abazia da Barbara de Castelmur cumpigliava in grond vestibul cun bucca-pigna per la pigna da stiva, la stiva abaziala ritgamain entagliada cun balcun tort, pigna e banc-pigna, e la chombra cun isch a l'archiv da la claustra e sortida al secret vi da la fatschada dal nord. Quest access privat e controllà a l'archiv è ina spezialitad. Pli tard è quel vegnì serrà e remplazzà tras in'entrada nà dal sid.


Il tavlegià gotic-tardiv è fin ciselà sin in fund da palpiri cotschen. Er las curnischs ornamentalas èn per part coluradas. Ed in ritg decor entaglià chattain nus er en la chombra.


L'abazia de Castelmur è sa midada cun il gir dals onns

Las successuras han vinavant fatg diever da l'abazia de Castelmur e l'han per part transfurmà. En la segunda mesadad dal 17-avel tschientaner è la stiva vegnida picturada cun farina da crap grisch cler. Ed en il segund quart dal 19-avel tschientaner han ins picturà il tavlegià cun l'uscheditg verd da Schweinfurt glischant che cuntegna dentant arsen. Pli tard han ins anc diversas giadas dà giu alv. Las rasadas luccas e da tissi han ins allontanà, las ulteriuras vettas han ins laschà. Uschia sa mussa la stiva oz en maniera barocca.


Abazia, lieu da reuniun, chombra da farina e stanza da studi per las novizas

La stiva abaziala para d'esser stà per lung temp il lieu da reuniun. Da quai dattan testimonianza ils bancs lung ils mirs. En il 20-avel tschientaner serviva quest local sco stiva da taisser, chombra da farina, deposit da tarpuns e biro auxiliar. En avegnir duai la stiva daventar ina part dal noviziat e servir a las novizas sco stanza da dimora e da studi.


La restauraziun n'è anc betg finida

L'anteriura chombra ed il vestibul da l'abazia Castelmur han ins anc da restaurar. Perquai che la finanziaziun da questas lavurs n'è anc betg segirada dal tut, sa legra la fundaziun "Pro Kloster St. Johann" sur da mintga donaziun che accelerescha las lavurs da renovaziun e scursanescha uschia il spetgar da las mungias sin lur "nova" stanza da studi.