Emprim terz dal 13-avel tschientaner:
Il miracul da la hostia dal sontg sang

In miracul en la claustra da Müstair

«La mungia Agnes, figlia d'in chavalier da Sent en l'Engiadina Bassa, haja ina Gievgia sontga retschavì la hostia sontga cun ina conscienza problematica. Ma lura na l' haja ella betg mangià, mabain zuppentà en ses vel e conservà en sia trucla. Cur ch'ella ha lura observà, co che la hostia è sa transmidada en charn e sang, ha ella revelà quest fenomen al spiritual Joannes da la claustra.» (tenor Iso Müller, Geschichte des Klosters Müstair, S. 63). Quai è capità en l'emprim terz dal 13-avel tschientaner en la claustra a Müstair.

 

I cumenza il pelegrinadi a Müstair

Il spiritual è mitschà cun la reliquia dal sontg sang a Partschins sper Meraun. La hostia miraculusa è sa midada danovamain, ed il spiritual è sa deditgà cumplettamain a sia veneraziun. Ma l'abadessa Adelheid da quella giada ha intimà pader Joannes da purtar la hostia enavos a Müstair. Cun quai ha cumenzà il pelegrinadi al sontg sang a Müstair.

 

Istorgia commoventa da la hostia dal sontg sang

Il pelegrinadi è vegnì interrut la fin dal 15-avel tschientaner, cur che la hostia miraculusa è vegnida engulada dals Tirolais durant la battaglia da Chalavaina dal 1499. Suenter la victoria dals Grischuns e la pasch da Basilea dals 22 da settember 1499 ha ella dentant - sin insistenza da l'uvestg da Brixen - stuì vegnir restituida a la claustra.

L'onn 1597 ha l'abadessa Ursula von Schlandersberg laschà malegiar l'istorgia dal miracul sin la paraid tranter l'apsida centrala e quella dal nord en la baselgia claustrala. Ins vesa la communiun da las mungias la Gievgia sontga, il miracul dal sontg sang, ils remors da conscienza e la confessiun da la mungia Agnes, sco er la vereraziun da la monstranza. Suten è situà il tabernachel, en il qual ins aveva conservà la hostia enfin l'onn 1758.

En quel onn è la reliquia vegnida transferida en la chapella dal sontg sang - oz chapella da las grazias - ch'era vegnida construida aposta per ella. Là n'è ella betg restada ditg, perquai che dal 1799, en la segunda guerra da coaliziun, han ils Franzos sblundregià la claustra, e dapi quella giada è er la reliquia dal sontg sang svanida. Restads èn la chapella ed ils maletgs che regordan a quest miracul.