Mesadad dal 12-avel tschientaner: San Jon a Müstair daventa ina claustra per mungias

Muntgs van davent e mungias vegnan

Uvestg Egino ha surlaschà l'onn 1163 sia residenza al giuven convent da soras ed ha sa laschà construir nord da la Tur Planta in palas (ina sala represchentativa) inclusiv edifizis accessoris. Quest fatg sco er la scuverta d'in pitschen zain dal 12-avel tschientaner cun l'inscripziun

+ DVLCEM [·DAT S]ONUM · VENIAT · PIA · TVRBA · SORORUM
„Cur ch'el dat in sun dultsch, vegnia natiers la fulla pia da las soras.“

dattan perditga ch'enturn 1150 entran mungias en la claustra e ch'ils muntgs van davent. Dapi quella giada vivan qua soras benedictinas en il ritmus reglà dal „ora et labora et lege“.

Frescos novs en la baselgia claustrala

Cun l'arriv da las mungias datti er novas picturas en il chor da la baselgia. Oz fascineschan quests frescos romanics cun lur intensitad da glisch e dinamica. Amez vegn mussà il banchet da Herodes cun il saut da Salome, cun la decapitaziun da Joannes Battista, cun la preschentaziun da ses chau tras ina Salome sgobada e cun la sepultura dal sontg. Ils cuntegns carolingics vegnan per part repetids en la pictura romanica. Lur expressiun fa dentant in effect pli dinamic ed ha dapli detagls che la pictura carolingica ch'è caracterisada tras quietezza e ruassaivladad.