La vita en claustra

La vita en claustra è ina vita en cuminaza sut "regla ed avat" en in midament equilibrà d'uraziun, lavur e lectura spirituala. Dapi sia fundaziun en il 8-avel tschientaner è la claustra da Son Jon a Müstair stada abitada permanentamain. Il spiert benedictin è bain evident. Il S. Benedict ha cun sia regla mess il fundament per ina cuminanza d'in urden, nua ch'ils frars e las soras sa scuntran en respect ed umilitad, s'inspireschan e sa gidan vicendaivlamain, procuran per il bainesser da la cuminanza e tschertgan Dieu, ensemen sco er individualmain, ed al van encunter.


In mintgadi cleramain structurà

Tranter la vigilgia, il laud da la damaun a las 5.30, e la complet, l'uraziun da la notg a las 19.30, èn 14 uras dal mintgadi cleramain structurà en claustra: urar, chantar psalms ed imnis al laud da Dieu, lavurar, meditar, leger, mangiar, taschair: di per di, onn per onn, decennis, tschientaners a la lunga. Il decurs dal di da las soras benedictinas da Müstair è oz en sasez il medem sco avant 1500 onns, cur ch'il S. Benedict aveva scrit sia regla. En il center stat la cretta, il tschertgar ed adurar Dieu. Latiers gida il decurs dal di reglà, perquai ch'el porta calma en il di.


Tgi che pensa dentant ch'il temp stettia quiet en claustra e che la vita moderna sa fermia davant la miraglia claustrala, quel è sa sbaglià. Computers ed e-mails han surmuntà ils mirs ch'èn 1200 onns vegls. Termins e tschentadas, conferenzas e duairs mundans tutgan gist tant tar il mintgadi da las mungias sco lur uras canonicas.


Sin l'emprim sguard para la colliaziun stretga da la claustra cun instituziuns na-religiusas da periclitar il ritmus quiet dal di da las mungias. Ma la spiritualitad da Benedict n'è betg simplamain ina metoda sitga per trenar il spiert - ella è liada stretgamain cun la vita dal mintgadi en la claustra ed ha uschia sia plazza er en il mund modern ch'è multimedial, global ed adina pli svelt.



Ina vita deditgada a Dieu


Sche Vus dumandais las mungias da Müstair suenter lur motivs da s'avair decisas d'entrar en claustra, lura vegn mintgina a raquintar in'autra istorgia. A tuttas è dentant cuminaivel il giavisch, da vegnir pli daspera a Dieu. La via en claustra n'è però betg be in singul pass, igl è anzi in crescher lien, in emprender permanent. Benedict conguala la claustra cun ina "scola en servetsch dal Segner" (RB, prolog 45). El di sez che la via na po betg esser autra che stretga al cumenzament. "Tgi che fa dentant progress en la cretta claustrala, quel tschiffa in cor vast e quel va en la fortuna immensa da l'amur la via dals cumandaments da Dieu." (RB, prolog 49)


Oz èn quai nov dunnas che vivan mintga di la spiritualitad benedictina en la claustra da Son Jon a Müstair. Dapi schaner 2013 maina sora Domenica Dethomas la cuminanza claustrala. Sia maniera averta e plaina d'umor mussa che "esser mungia" na signifitgeschan betg be severitad e rigurusitad.